“Azərbaycan
Respublikasında 2023-cü ilin “Heydər Əliyev ili” elan edilməsi ilə bağlı Tədbirlər
Planı”nın təsdiq edilməsi haqqında Azərbaycan Respublikası Prezidentinin
2022-ci il 28 noyabr tarixli sərəncamının icrası ilə bağlı Xocalı Rayon İcra
Hakimiyyətinin tədbirlər planına əsasən 28 mart 2023-cü il tarixdə "Heydər
Əliyev və azərbaycançılıq məfkurəsi" mövzusunda konfrans keçirildi.

Tədbirdə
rayon icra hakimiyyəti aparatının başçısı Şahmar Usubov, idarə, müəssisə rəhbərləri,
YAP fəalları, vətəndaş cəmiyyətinin nümayəndələri, ziyalılar, şəhid ailələri və
qazilər iştirak etdilər.

Tədbir
iştirakçıları əvvəlcə qəsəbədə ucaldılan Ulu öndər Heydər Əliyevin abidəsini
ziyarət edərək dərin ehtiram əlaməti olaraq abidə önünə gül dəstələri düzdülər.


Xocalıların
kompakt şəkildə müvəqqəti məskunlaşdıqları Goranboy rayonunun Aşağı Ağcakənd qəsəbəsində
fəaliyyət göstərən Xocalı rayon Mədəniyyət Evində keçirilən tədbirdə əvvəlcə
Dövlət Himni səsləndirildi, Ümummilli Lider Heydər Əliyevin, torpaqlarımızın
azadlığı uğrunda mübarizədə canlarını qurban vermiş Vətən oğullarının əziz
xatirəsi bir dəqiqəlik sükutla yad edilib.

Çıxış
edən Xocalı rayon İcra hakimiyyətinin başçısı Şahmar Usubov,  İctimai-siyasi və humanitar məsələlər şöbəsinin
müdiri Lamiyə Qarayeva, Yeni Azərbaycan Partiyası Xocalı rayon təşkilatının sədri
Vahid Əliyev, rayon ziyalısı Ramiz Qəhrəmanov və digər natiqlər bildirdilər ki,
Ulu öndər Heydər Əliyevin fədakarlığı, cəsarəti və uzaqgörənliyi sayəsində dövlətçiliyimizin
və müstəqilliyimizin böyük fəlakətdən xilas olmasından, dahi rəhbərin hər zaman
milli ideologiyanı və azərbaycançlıq məfkurəsini hər şeydən üstün tutmasından,
dünya azərbaycanlılarının vahid milli ideologiya ətrafında birləşdirilməsi
istiqamətindəki əvəzsiz xidmətlərindən danışıblar. Bildirilib ki, ümummilli
lider Heydər Əliyev azərbaycançılıq məfkurəsinin, azərbaycançılıq ideyasının
banisidir. Dahi rəhbərin müəllifi olduğu, sistemləşdirdiyi azərbaycançılıq
ideologiyası təkcə bu ölkənin ərazisində yaşayan insanları yox, eyni zamanda,
bütün dünyada məskunlaşan azərbaycanlıları əhatə edir. Ümummilli Liderimizin
ideya və prinsiplərinə sadiq qalan Azərbaycan Prezidenti İlham Əliyevin Ulu Öndərin
siyasətini uğurla davam etdirməsi nəticəsində həmvətənlərimizin birlik və həmrəyliyi
daha da möhkəmlənib. Azərbaycançılıq ideologiyası Vətən müharibəsi dövründə də
milli birliyimizin təmin olunmasında əsaslı rol oynadı.

         Tədbirdə
həmçinin dahi şəxsiyyət Heydər Əliyevin əziz xatirəsinə həsr edilmiş sənədli
film nümayiş etdirildi.